မေတ္တာစာ

သူ့ဘာသာ ရှင်သန်နေတဲ့အရာတွေကို

ကိုယ့်အတ္တ

နာမည်တပ်လိုမှု သက်သက်အတွက်

မသေဆုံးစေချင်ပါဘူး။

အိမ်ရှေ့က ရွက်လှပင်ကလေးမှ မဟုတ်ပါဘူး

တကယ်တော့ အနုပညာဟာလည်း သက်ရှိပဲ။

အချစ် အမုန်း အာဃာတ

မမြင်ရတဲ့ စိတ္တဇနာမ်တွေကလည်း သက်ရှိပါပဲ ။

ကျွန်တော့်လက်ဆိပ်တက်ပြီး

ကဗျာလေးတစ်ပုဒ်တောင် မသေဆုံးစေချင်ဘူး ။

သူ့ဝိညာဉ်မှာ

ကျွန်တော့်ကို မုန်းတဲ့အမုန်းတွေ ကပ်ပါမသွားစေချင်လို့ပါ ။

အခုတလော

ကျွန်တော်ဟာ တွေးသင့်တာထက် ပိုတွေးမိလို့

မလိုလားအပ်ဘဲ စကားတွေလည်း ဆွံ့အနေခဲ့ပါတယ်..။

အထက်ကဆိုခဲ့သလို ကိုယ့်အတ္တကိုယ် အလို မလိုက်ချင်လို့ပါ ။

ကျွန်တော်ပါးစပ်က စကားတစ်ခွန်းဟာ

သေနတ်မောင်းခလုတ်ကို ဆွဲလိုက်သလို

တစ်စုံတစ်ယောက် စိတ်နှလုံးကို ချိန်ရွယ် ပစ်ခတ်မိမှာစိုးလို့

ထိန်းထားရင်းနဲ့….

ကျွန်တော်ဟာ တဖက်ရဲ့ ရှင်သန်ခြင်းကို မသတ်ချင်သလို

ကိုယ့် ရှင်သန်ခြင်းကို သတ်မိသူများ ဖြစ်နေပြီလား ။

ကျွန်တော်အတွက်နဲ့

တစ်လှေလုံး မပုပ်အောင် အတတ်နိုင်ဆုံး ရှောင်ကျဉ်ခဲ့ပါတယ်။

ရွက်လှပင်လေးက အစ

ကဗျာကလေးတွေအလယ်

မိတ်ဆွေတို့အထိ

တစ်စုံတရာ ထိခိုက်ခဲ့တယ်ဆို ခွင့်လွှတ်ပေးဖို့

ကျွန်တော့်ဖက်ကလည်း

ခွင့်လွှတ်ပေးဖို့ အသင့်ရှိတဲ့အကြောင်း

မေတ္တာတရားကို စာလုံးပေါင်း မှန်အောင် ရေးလိုက်ပါတယ် ။

လင်းဒီပ

၂၅.၁၁.၀၉