Thursday, June 21, 2012

အနွေးထည်


ချစ်စဖွယ် ဖြူလွလွလေး
ထွေးထွေး
နွေးနွေးလေးရှိမယ့်ပုံ ။

ချစ်သူ့ဘဝ
နှင်းတွေ တဖွဖွကျနေလိုက်တာ
ရိုမန်တစ် ဆောင်းညများ
တစ်ဘဝလုံး ဆောင်းချည့် တွေ့ရတော့မှာလို…

“ချစ်သူဟာ ကိုယ့်အတွက် အနွေးထည်လေးလိုပါပဲကွယ်”လို့
ဆိုပြီး.. ဆိုနေပြီး..
ကဗျာကို ဂါထာလို ရွတ်ရင်းနဲ့။

ဘဝနွေရာသီ အပူချိန် အမြင့်တစ်ခုနဲ့
ကန္တာရနေ့ဆိုးညဆိုးကြီးတွေ
တကယ် ဖြတ်လျှောက်ရတော့
ဝတ်ထားတဲ့အနွေးထည်ကြီး ပြန်ချွတ်ရတော့မလို
ချစ်ခြင်းဟာ ချွေးတလုံးလုံးနဲ့ ။

လင်းဒီပ
၂၁.၀၆.၁၂

Saturday, March 24, 2012

စ်ာပန

တစ်ခန်းထဲ ခေါ်သံအေးစက် …


ထမင်းစားပွဲ

ဟင်းခပ်ထည့်ပေးတာ စက်ရုပ်မလေးလား ။


အိပ်ယာထဲ တစ်ဖက်ဆီ တိုးလို့

ကိုယ့်ကမ္ဘာဆီ ကိုယ်စီပြန်ပြေးနေမိသလား ။


လေဟာနယ်ထဲ ဆွဲအားမဲ့နေကြသလို

တစ်ယောက်ကို တစ်ယောက်လွတ်မြောက်


အချစ်က

အတောင်စုံတဲ့အခါ

ပျံထွက်သွားတဲ့ ငှက်တစ်ကောင်လား ။


လင်းဒီပ

၂၄.၀၃.၁၂

Saturday, March 3, 2012

သူငယ်ချင်း

သူ့ဘဝမှာ တောက်တိုမယ်ရအဖြစ်

ဖြူဖြူစင်စင် ထည်ဝါခဲ့ပုံလေး

လွမ်းဆိပ်တက်ပေါ့ ။


မရောက်မှာသိပေမယ့် လျှောက်ရဲခဲ့တဲ့နေ့များ

(အခုတော့)

ရောက်မှာသိလို့ လမ်းလွှဲလိုက်ရတဲ့ အဖြစ်မျိုး…


ဖွင့်ဖွင့်ပိတ်ပိတ် သိပ်မထူးတော့တဲ့ အရွယ်မှာ

ဘာကို လျှို့ဝှက်နေရဦးမှာလဲ

ချစ်ခဲ့ဖူးတယ် ။


တခါ ပြန်ဝင်စားလို့ရမလား

သူ့နှလုံးသားအထပ်မြင့်အခန်းလေးကို

မမှီ့ တမှီ ပျော်ရွှင်နေတတ်တဲ့

ကိုင်းဖျားကိုင်းနားဘဝလေး ။


လင်းဒီပ

၀၃.၀၃.၁၂

Thursday, February 23, 2012

ယုံကြည်မှုစစ်တမ်း

ယုံကြည်မှုက ကျနေတဲ့ ကွန်နက်ရှင်လား ။

ယုံကြည်မှုက ခေါ်ရခက်တဲ့ ဖုန်းလား ။

ယုံကြည်မှုက ကြိုက်ဈေးပေးပြီး ဝယ်လို့မရ ။

ယုံကြည်မှုချမ်းသာနေတဲ့သူက ယုံကြည်မှုချို့တဲ့နေတဲ့သူဆီ ယုံကြည်မှုစွန့်ကြဲလို့ မရ။

ယုံကြည်မှုက ဘယ်ရာသီမှာ ဆက်ဆက်ရောက်လာလိမ့်မယ်လို့ မျှော်ခိုးလို့ မရ ။

ယုံကြည်မှုက ရွက်ကျပင်ပေါက် မဟုတ်တော့ လမ်းပေါ်တက် လက်ပြတားလို့ မရ ။

မျက်နှာချင်းဆိုင်ပြီးတဲ့နောက် ပုခုံးချင်းဖက်ပြီးတဲ့နောက်

တစ်ယောက်ခြေထောက် တစ်ယောက် နင်းနေပြန်တော့လည်း ယုံကြည်မှုက သဲထဲရေသွန် ။

ကွေ့ခဲ့ ကောက်ခဲ့တဲ့ မြစ်တစ်စင်းမှာ မြစ်ကျိုးအင်းတွေ ခြေရာကျန်ခဲ့သလိုမျိုး

ကောက်နေတဲ့ဆံပင်ကို ဖြောင့်စက်က လက်လျှော့သွားသလိုမျိုး

ယုံကြည်မှုက တည်ဆောက်ရင်း ကျိုးပဲ့

ကြိုးစားတုန်းမှာ ပျက်စီး

ဝဋ်ကြွေးပါတယ်လို့ပဲ ခပ်လွယ်လွယ် ဖြေသိမ့်လိုက်ရမလား ။

ကျိန်စာမိနေတာလို့ပဲ မရဲတရဲ စွပ်စွဲလိုက်ရမလား ။

အတူတူ လှမ်းနေရက် နဲ့ မနီးနိုင်တဲ့အခါ

အတူတူ ငြှိမ်းနေရက်နဲ့ မငြိမ်းနိုင်တဲ့အခါ

အတူတူ ပြုံးနေရက်နဲ့ မရယ်နိုင်သေးတဲ့အခါ

ယုံကြည်မှုဟာ ကြောက်သွေးပါနေသလား ။

ယုံကြည်မှုက ပေါင်းသင်းဆက်ဆံရေး ညံ့တာလား ။

ယုံကြည်မှုက အစွဲအလမ်းကြီးတာလား ။

ယုံကြည်မှုက ဥပါဒ်ဒဏ်ကြောင့် ဥပါဒ်ရောက်ရတာလား ။

ယုံကြည်မှုက ပွဲလမ်းသဘင် ရှောင်တာလား ။

ညည အိပ်ရာထဲက ပျောက်သွားတဲ့ခင်ပွန်းသည်ကို မယုံကြည်နိုင်သလိုမျိုး

ဒရိုင်ဘာကောင်လေးနဲ့ ရင်းနှီးလွန်နေတဲ့ ဇနီးသည်ကို မယုံကြည်နိုင်သလိုမျိုး

မျက်လုံးတစ္ဆေလို သီချင်းမျိုး နားထောင်နေရတာမျိုး

တစ်ယောက်အရွေ့ကို တစ်ယောက်က စောင့်ကြည့်နေရတာမျိုးဆိုလည်း

ယုံကြည်မှုက မွေးရ ဖွားရ ခက်ပေါ့ ။

ယုံကြည်မှုကို ယတြာချေလို့ မရဘူး ။

ယုံကြည်မှုကို ထောက်ခံစာနဲ့ မရဘူး ။

ယုံကြည်မှုကို ခေါ်လို့ရတဲ့ ဂါထာမရှိဘူး ။

ယုံကြည်မှုက စားပွဲအောက်က ချိန်ထားတဲ့ သေနတ်မဟုတ်ဘူး ။

ယုံကြည်မှုက တွင်းထွက် သယံဇာတ မဟုတ်ဘူး ။

ယုံကြည်မှုက ပျက်စီးသွားတဲ့ သဘာဝပတ်ဝန်းကျင်ထဲမှာ မပါဘူး ။

ယုံကြည်မှုက အကန့်အသတ်နဲ့ပဲ ထွက်ရှိနိုင်တာလည်း မဟုတ်ဘူး ။

ယုံကြည်မှုက

ယုံကြည်မှုက

…..

…..

ခက်တော့ ခက်သား

တချို့အတွက် ယုံကြည်မှုက စနစ်တကျ တိုင်းတာ တွက်ချက် စိုက်ပျိုးယူနေရတုန်း

တချို့မှာ မျက်နှာမြင်ရုံနဲ့ ယုံကြည်သွားတာကျတော့ ပဋ္ဌာန်းဆက်လို့ အလွယ် ယုံလိုက်ရမလား ။

လင်းဒီပ

၂၃.၀၂.၁၂

Sunday, February 12, 2012

သကြားလုံးကလေးတွေ

သကြားလုံးကလေးတွေက ချစ်စဖွယ်

ရောင်စုံပလတ်စတစ်လှလှလေးတွေနဲ့ ထုတ်ပိုးထားလို့ ။

သကြားလုံးကလေးတွေက

ချိုမြိန်တာချင်း တူပေမယ့် အနံ့အသက်မှာ အနည်းငယ် ကွဲပြားလို့ ။

မချိုမချဉ်လုပ်တတ်သော သကြားလုံးကလေးများနဲ့

ဖြည်းဖြည်းချင်း စိတ်ကို လှုပ်ရှားစေသော သကြားလုံးကလေးများနဲ့

မူးဝေမှုကို ပြေပျောက်စေသော သကြားလုံးကလေးများနဲ့

မူးဝေယစ်မူးစေသော သကြားလုံးကလေးများနဲ့

(ဘယ်လိုဖြစ်ဖြစ် ဘာပဲဖြစ်ဖြစ်)

သကြားလုံးကလေးတွေ မြင်ရင်

အနည်းနဲ့အများတော့ ခင်ဗျား လန်းဆန်းသွားတယ် မဟုတ်လား

အနှေးနဲ့အမြန်တော့ ဖရီကွင်စီ(frequency)တစ်ခုမှာ ခင်ဗျား သွားငြိတယ် မဟုတ်လား

သကြားလုံးကလေးတွေ အများကြီးစားလို့မရဘူး ဆိုတာ ကျွန်တော်တို့သိတယ်လေ

ပတ်ဝန်းကျင်က လက်မခံနိုင်သလို ကျွန်တော်တို့ သွားပိုးစားနိုင်တယ် မဟုတ်လား ။

(ဒါပေမယ့် ဘာရယ်မဟုတ်)

ဝသီအရ သကြားလုံးကလေးများ မြင်ရင် ချိုမြိန်မှုကို စိတ်ကူးနဲ့ စားလို့ ။

ဒီနေ့ မိတ်ဆွေ မင်္ဂလာဆောင်မှာ

မိတ်ကပ်လာပြင်ပေးတဲ့ သကြားလုံးကလေးက

ချိမြိန်မှုကို လှစ်ကနဲ လှစ်ကနဲ ပြရင်း စကားတွေ လာပြောလို့ ။

ဒီနေ့ မိတ်ဆွေ မင်္ဂလာဆောင်မှာ

သကြားလုံးကလေးတွေက ချိုချိုလွင်လွင် တေးကို ဟစ်လို့ ။

ဒီနေ့ မိတ်ဆွေ မင်္ဂလာဆောင်မှာ

သကြားလုံးကလေးတွေက ဝိုင်ခွက်တွေထဲ ရီဝေမှုကို မှောက်ချလို့ ။

(ဘယ်လိုဖြစ်ဖြစ် ဘာပဲဖြစ်ဖြစ်)

တချက်တချက် ညာဘက်လက်သူကြွယ်က လက်စွပ်ကလေးကို ပွတ်သပ်မိရင်းက

တချက်တချက် ညာဘက်လက်ကို ဘောင်းဘီအိတ်ထဲ ထိုးဝှက်ထားမိရင်းက

သကြားလုံးလေးတွေအပေါ် စိတ်ကူးနဲ့ချိုမြိန်လိုက်မိတာ

အိမ်သူ,မသိအောင် ကျွန်တော် ခင်ဗျားကို ဝန်ခံလိုက်ချင်ရဲ့ ။

လင်းဒီပ

၁၂.၀၂.၁၂

Wednesday, February 8, 2012

သံယောဇဉ်လက်ကျန်

ဝေဝါးခဲ့သော နေ့များစွာလို ဝေဝါးနေတုန်းပါပဲ ။


လှမ်းနိုင်တဲ့ အကွာအဝေးထိ

အခိုက်အတန့်တစ်ခုစာ နီးကပ်ခဲ့ကြပြီးမှ

ဝေးကွာခြင်းတစ္ဆေက

ခေါ်သံအေးစက်နဲ့ ရောက်လာ…။


ဆောင်းမရှိတဲ့အရပ်မှာ

အအေးပတ်နေတဲ့ တယ်လီဖုန်းလေး

ခေါ်သံ

ခြောက်ကပ် အက်ကွဲ…


သံယောဇဉ်က ခေါင်းတွဲနှစ်ဖက်ပါတဲ့ မီးရထား

ရှေ့တိုး ခေါ်ငင်လိုက်

နောက်ကို ပြန်ဆုတ်လိုက်နဲ့


မြင်နေရက်နဲ့ ဝေးခဲ့တဲ့နေ့များကို

ဝေးတဲ့အခါ ပြန်မြင်နိုင်ပါလိမ့်မယ် ။


နောင်တရစရာ မလိုပါဘူး

ချစ်ခြင်းဆိုတာ မိုးရွာတုန်း ရေခံရတာမျိုးမဟုတ်ဘူး

တို့နှလုံးသားတွေက ပြည့်အန်တင်းကျပ်

ဘယ်တော့မှ ဘောင်ဘင်မခတ်ဘူး

သံသရာတစ်ခုစာ …။


လင်းဒီပ

၀၈.၀၂.၁၂

Wednesday, February 1, 2012

ကျောက်ခေတ်နတ်သမီး

(က)

နာမည်ဆိုတာ ကျွန်တော်တို့ စကားမပြောတတ်ခင် ( ကြိုက်တယ် မကြိုက်ဖူး ပြန်မပြောတတ်ခင်)မှာဘဲ လူကြီးတွေက မေး စမ်း တွက် ချက် လို့ မှည့်ပြီးသား ဖြစ်နေတတ်သည် ။ ကျွန်တော်တို့ ဘယ်လိုမှ ရွေးချယ်ခွင့် မရသော ကိစ္စလည်း ဖြစ်သည် ။ သို့သော် ဘဝတွင် အတော်လေးတော့ အရေးပါသည် ။ လူကို မမြင်ဖူးခင် ကျွန်တော်တို့က နာမည်ကို စကြားရသောကြောင့် ဖြစ်ပါသည် ။ ဗလာစာအုပ်အဖုံးမှာ စာအုပ်ထောင့်နားလေးမှာ ပစ္စည်းတစ်ခုခုမှာ ရေးထားသော နာမည်နှင့် လက်ရေးကို ကြည့်ပြီး ကျွန်တော်ကို သုံးသပ်ကြ ထင်ရာတွေပြောကြ ပြုံးစိစိ လုပ်တတ်ကြပါသည် ။

ကျွန်တော့် ပထမဆုံးနာမည်မှာ သော်တာထွန်း ဖြစ်သည် ။ သူငယ်တန်း စတက်ကတည်းက မူလတန်းကျောင်းသားဘဝ တလျှောက်လုံး ဆရာမတွေက မသော်တာထွန်းလို့ မှားခေါ်လေ့ရှိပြီး တစ်ခန်းလုံးက ဝိုင်းရယ်ကြသည် ။ အိမ်ရောက်တဲ့အခါ လူကြီးတွေကို ငိုပြီး ပြန်ပြော အရေးဆိုတော့ စတုတ္ထတန်းမြို့နယ်စစ် စာမေးပွဲ မတိုင်ခင် အိမ်က ယောက်ျားဆန်ဆန် နာမည်တစ်ခု ပြောင်းပေးလိုက်သည် ။ ဒါက နာမည်နဲ့ ပတ်သက်ပြီး ပထမဆုံး အမှတ်တရပင် ။

(ခ)

ဆယ်တန်းရောက်လို့ day special (လူနှစ်ဆယ်လောက် စုထားသည့် စာသင်ဝိုင်း) တက်တော့ ရွှေအိဆိုသည့် အသားဖြူဖြူ ကောင်မလေးတစ်ယောက်လည်း ပါလာသည် ။ ကောင်မလေးက ရန်ကုန်မှာ မွေးပြီး ရန်ကုန်မြို့ရဲ့ အထင်ကရ အထက်ကျောင်းတစ်ခုမှ ဖြစ်သည် ။ ကျွန်တော်တို့အားလုံး သူမ နာမည်ရင်းကို မသိကြ ။ သူမ ဗလာစာအုပ်မှာလည်း ရွှေအိလို့ပဲ ရေးထားတတ်သည် ။ တစ်ရက် သူမကျောင်းသားကဒ်လေးကို သူငယ်ချင်း မျောက်လောင်းမှ တဆင့် လက်ထဲရောက်လာတော့ နာမည်ရင်းက ကျွန်တော်တို့ အဖွားခေတ်က နာမည်မျိုးကြီး ။ ခပ်ရိုးရိုးနှင့် တောဆန်ဆန် ။ ဒါကြောင့်လည်း ဒီကောင်မလေး သူ့ကိုယ်သူ ရွှေအိလို့ပဲ မိတ်ဆက်ထားတာ ဖြစ်ပေလိမ့်မည် ။

ဆက်ပြီး ဝန်ခံရလျှင် အလှရွှန်းစို သာမောသော မြကျွန်းညို ကဗျာတောမှာ ရွှေအိနှင့် ပြန်တွေ့သောအခါ သူမအလှတရားတွင် ကျွန်တော့်နှလုံးသားလေး ပုံလျက်သား လဲကျသွားခဲ့သည် ။ ရွှေအိဓာတ်ပုံကို သူငယ်ချင်းများကို ပြသောအခါ မင်းက ကံကောင်းသားပဲလို့ လုပ်ကြသည် ။ နာမည်ကို ပြောပြလိုက်သောအခါ မနောက်ပါနဲ့ကွာ ဆိုတာ ကြားနေကျစကားပင် ။ သူမရဲ့ အနစ်နာခံတတ် ကြင်နာတတ် အလျော့ပေးတတ် ဘာသာတရားကိုင်းရှိုင်းသော စိတ်ဓာတ်များကြောင့် သူမကို ကျွန်တော် ဂျနီဖာလိုပါဇ်နှင့် ဒဲ့ဒဲ့ချင်းပင် မလဲနိုင်ခဲ့ပါ ။( လေဒီဂါးဂါးပါ အဆစ်ထည့်ပေးမည် ဆိုလျှင်တော့ စဉ်းစားရပေလိမ့်မည် :D )

ချစ်သူဘဝမှာ အိမ်ကို ခေါ်သွားတော့ ဖေဖေက “ မင်းကောင်မလေး မိဘတွေက ရှေးဟောင်းပစ္စည်းတွေ မြတ်နိုးပုံရတယ်ကွ ။ဒါကြောင့် သူတို့သမီးကို ရှေးတုန်းက နာမည်မျိုး မှည့်ထားတာ” လို့ စပါသည် ။ သူမမှာ ကံကောင်းတာလည်း ရှိပါသည် ။ နာမည်အရင်းနဲ့ ဂျီးမေးလ်အကောင့်လုပ်တော့ ချက်ချင်းရသည် ။ နာမည်တူ မရှိ ။သူများတွေလို ဝမ်းတူးသရီးတွေ dot တွေ ထည့်နေစရာ မလို ။ တခါတလေတော့ သူမကို ကျွန်တော်က စပါသည် ။ “ဝိုင်းစုခိုင်သောင်းတို့ နန်းစုရတီသောင်းတို့ ပြောင်းလိုက်ရင် မကောင်းဘူးလား” လို့ ။ စိတ်လိုလက်ရရှိသည့်အခါ ကလေးလေးတွေ မွေးလာတဲ့အခါကျရင် နာမည်လှလှလေးတွေ ပေးရအောင်နော်လို့ ပြောတတ်ပါသည် ။ ထိုအခါ ကျွန်တော်က ကျွန်တော်နှင့် အီစီကလီဖြစ်ခဲ့ဖူးသော မိန်းကလေး နာမည်တွေ ရွတ်ပြပြီး အဲလိုနာမည်လေးတွေ ပေးတာပေါ့လို့ မျက်စောင်းလှလှလေး လိုချင်စိတ်ဖြင့် စနောက် မိတတ်ပါသည် ။

တကယ်တမ်းတော့ သူမနာမည်သည် ကျွန်တော့်ဘဝမှာ အဓိက မကျခဲ့ပါ ။ ကျွန်တော်နှင့်အတူ အေးအတူ ပူအမျှ လောကနေ့စွဲတွေကို ကူးဖြတ်ရဲတဲ့ ကူးဖြတ်ချင်စိတ်က သူမရဲ့ တန်ဖိုး ဖြစ်ပါသည် ။ နာမည်လှလှလေးနှင့် ချစ်စဖွယ်ရှိနေတတ်သော်လည်း တကယ်တမ်း ဘဝတစ်ခုတည်ဆောက်ဖို့ကို လိမ်မာစွာ ငြင်းပယ်သွားခဲ့သော မိန်းကလေးများထက် ကျွန်တော့် ရှေးဟောင်းပစ္စည်းလေးက ပိုမက်မောဖွယ် ကောင်းခဲ့ပါသည် ။ ငယ်စဉ်က သူငယ်ချင်းများနှင့် သူမကို မိတ်ဆက်ပေးတဲ့အခါ သူမနာမည်ကို ထွက်ဖို့ သူမကော ကျွန်တော်ပါ နှုတ်ရွံ့နေတတ်ပေမယ့် တစ်ယောက်ကိုတစ်ယောက် ယုံကြည်ပေါင်းစည်းမိတဲ့နောက်မှာတော့ ဘာမှ မဟုတ်တဲ့ ကိစ္စလေးတစ်ခုအဖြစ် ကျွန်တော်တို့ကြားက ထွက်ခွာသွားခဲ့ပေတော့သည် ။

(ဂ)

ကျွန်တော်တို့ ခရီးဆက်မယ့် ဟိုင်းဝေးလမ်းမကြီးမှာ ကြယ်တွေ လင်းနေသည် ။ အဝေးပြေးကားဆရာက ကျွန်တော့်မှတ်ပုံတင်နံပါတ် မေးစဉ် သေချာ မကြားလိုက်ဘဲ သူမနာမည်လေးကို ယောင်ရမ်းဖြေမိသွားပါသည် ။

လင်းဒီပ

၃၁.၀၁.၁၂