လေယာဉ်ပျံ

ပြတင်းပေါက်ကနေ လှမ်းငေးနေတော့ ညနေရီ အမှောင်ထဲမှာ လေယာဉ်ပျံတွေ တစ်စီးနှင့် တစ်စီး သိပ်မခြားဘဲ ပျံတက်သွားတာ တွေ့ရသည် ။ ဒီနိုင်ငံလေးက သေးသေးလေးနဲ့ လေယာဉ်အတက်အဆင်း အတော်များသည် ။ နေ့လည်ပိုင်းဆိုလည်း စစ်လေယာဉ်တွေက တချိန်လုံးကောင်းကင်မှာ ပျံဝဲနေလိုက် ထိုးဆင်းသွားလိုက်နှင့် ကြည့်ရတာ စွန်ငှက်တွေလိုပင် ။ ကျွန်တော် နေထိုင်ကျင်လည် အလုပ်လုပ်သည့် ကျွန်း၏ အရှေ့ပိုင်းက လေယာဉ်ကွင်းတွေနှင့် နီးလို့လည်းဖြစ်နိုင်သည် ။ လေယာဉ်ကွင်းတွေ တစ်ကွင်းမက တဲ့အကြောင်း သူ့နိုင်ငံသား Taxi ဆရာနှင့် တခါ စကား လက်ဆုံကျရင်း သိရသည် ။

လေယာဉ်တွေကို ငေးကြည့်ရင်း မြန်မာဗီဒီယိုဇာတ်လမ်း တစ်ခုထဲက စကားတစ်ခွန်းကို အမှတ်ရရင်း ပြုံးမိသည် ။ မိန်းမတွေက လေယာဉ်ပျံတွေနှင့် တူတယ်ကွ ။ ကွင်းမကောင်းရင် ဝဲရုံပဲ ဝဲတယ် …ဘယ်တော့မှ မဆင်းဘူး ။ ကိုယ့်ဘဝမှာကော ဝဲရုံပဲ ဝဲခဲ့သည့် လေယာဉ်ပျံတွေ ဘယ်လောက်များ များခဲ့ပါလိမ့်။ တချို့
လေယာဉ်ပျံလေးတွေ ကတော့ ကွင်းနှင့် ခင်မင်သွားပြီး မဆင်းပေမယ့် ခုထက်ထိ လက်ပြနှုတ်ဆက် နေတတ်သည် ။ အင်း ကိုယ့်လေယာဉ်ကွင်းကြီးကလည်း ဘယ်လောက်တောင် စုတ်ချာနေခဲ့လည်းမှ မသိတာ ။ အန္တရာယ်မကင်းတဲ့ကွင်းတွေ ဆိုရင်တော့ မဆင်းတာဘဲ ပိုကောင်းပါတယ် လေယာဉ်ပျံလေးတွေရယ် ။

ညမီးရောင်အောက်တွင် လေယာဉ်ပျံတွေ မီးရောင်လက်လက် နှင့် တက်လာတာကို ကောင်းကင် အမဲရောင် နောက်ခံထားပြီး ကြည့်ရတာ စိတ်ထဲ တစ်မျိုးကြည့်လို့ကောင်းနေသည်။ ဟိုတလောက ဖတ်လိုက်ရသည့် ဆရာသုခမိန်လှိုင် ကဗျာလေး အမှတ်ရမိပြန်သည် ။

ဘ၀ဆိုတာ
အရူးမောင်းလာတဲ့ လေယာဉ်ပျံကိုစီးလာရတာပဲ။

ပိုပြီး
ပျော်ပျော်ရွှင်ရွှ့င်နေဖို့စဉ်းစားတယ်
ပြန်ဆင်းလို့ မရတော့ဘူးကိုး။
(သုခမိန်လှိုင်)
တကယ်ကို ဘဝဆိုတာကြီး အရူးမောင်းလာတဲ့လေယာဉ်ပျံကြီး စီးနေရသလို ။ ဘယ်တွေရောက်မယ် ဘာတွေဖြစ်မယ်မှန်းလည်းမသိ ။ ပြန်ဆင်းလို့ မရမယ့် အတူတူ ကိုယ့်ကိုယ်ကိုယ် ပျော်အောင် ထားနေရသည် ။

ငယ်ငယ်တုန်းက တိမ်တွေကို မြင်ဖူးချင်သည်။ လေယာဉ်ပျံဆိုတာ ဘယ်လိုမျိုးပါလိမ့်လို့ စီးကြည့်ချင်သည်။ သာမန်မိသားစုက မွေးဖွားလာသူ တစ်ယောက်အနေနဲ့ လေယာဉ်ပျံဆိုတာ စက္ကူနှင့် ချိုးလွတ်ရတဲ့ စက္ကူ လေယာဉ်ပျံလေးတွေပဲ အနားမှာရှိသည် ။ တိမ်တွေဆိုတာ ညနေစောင်း စွန်လွှတ်ရင်း ငေးမော ကြည့်ရတဲ့အရာပေါ့ ။ စွန်လွှတ်ရင်လည်း ကျွန်တော့်စွန် လေထဲရောက်အောင် အတော်လေးကို ခက်ခက်ခဲခဲ တင်ရသည် ။ ခက်ခက်ခဲခဲ လေထဲရောက်ပြန်တော့လည်း သူများစွန်နှင့် လေထဲတွင် မျှားရင်း များသောအားဖြင့် ကျွန်တော့်စွန်ပဲ ပြတ်ပြီး မျောလွင့်သွားလေ့ရှိသည် ။ ထိုအခါ နောက်ထပ် စွန်တစ်ကောင် ထပ်ဝယ် ခက်ခက်ခဲခဲ ထပ်တင် ထပ်ပြတ် ။ အိတ်ထဲက မုန့်ဖိုးတွေ ကုန်သွားတော့ ရစ်လုံးလေး အနားချ မြက်ခင်းပေါ် ထိုင်ရင်း တိမ်တွေ ကို ငေးမောကြည့် နေဖြစ်သည်။ လေယာဉ်ပျံတွေကို ငေးကြည့်နေမိသည် ။

စွန်ကို ကောင်းကောင်း မလွှတ်တတ် သူများနှင့် မျှားရင်လည်း နိုင်အောင် မဖြတ်တတ်သော ကောင်လေးသည် သူစီးဖူးချင်သည့် လေယာဉ်ပျံကို နှစ်ဆယ့်ခြောက်နှစ်သားမှ စီးဖူးသည် ။ကုမ္မဏီမှ စီစဉ်သော နိုင်ငံခြား ခရီးစဉ် တစ်ခုအတွက် ပထမဆုံး စီးဖူးသည့် ဖလိုက်က ညဘက် ရန်ကုန်မှ ဘန်ကောက်သို့ ပျံသန်းသောခရီး ။ ရန်ကုန် အပြည်ပြည်ဆိုင်ရာ လေဆိပ်ဟု ရှည်လျားစွာ ရေးထိုးထားသော လေဆိပ် အသေးလေး၏ Departure Room ကို ပထမဆုံး ရောက်ဖူးသည် ။ နောက်တော့ Departure Room ကနေ လေယာဉ်ဆီကို ဘတ်စ်စကား နှင့် ခေါ်လာသည် ။ လေယာဉ်နားရောက်သွားတော့ လေယာဉ် အင်ဂျင်သံကြမ်းကြမ်းကြီးက သဘောင်္ အင်ဂျင်သံနှင့် မထူးပါဘူးကွာ ဆိုပြီး တွေးမိသည်။ (စိတ်ထဲမှာ လေယာဉ်ဆိုတာ အင်ဂျင်သံလေးက အစ သာယာနေမလားလို့ စိတ်ကူးယဉ်မိတာ) လေယာဉ်ပေါ်ရောက်တော့ ဆာဝါဒီခ ဆိုသော အသံလေး ကတော့ ချိုမြသည် ။ Rဇာနည်၏ သီချင်း လေးတောင် အမှတ်ရမိသည် ။
……နင်ခရီးသည် ဆီးကြိုပုံလေး
….ငါ ခိုးကာ ငမ်းနေချိန်လေး
…..အမှတ်တမဲ့တွေ့တဲ့ လက်စွပ်လေးရယ်….

နောက်တော့လည်း နေ့ပိုင်းစီးဖြစ်တော့ တိမ်တွေကို လေယာဉ် ပြတင်းမှတစ်ဆင့် ငေးကြည့်ခွင့်ရသည် ။ တိမ်တွေနှင့် ထိခိုက်မိပြီး လေယာဉ် တုန်ခါသွားတဲ့အခါ တိမ်တွေ ကျီစယ်တာလို့ ကြံဖန်တွေးပြီး ပျော်နေမိသေးသည် ။ တကယ်တမ်းကျတော့လည်း တိမ်တွေဆိုတာ ကိုယ်တိုင်ထိတွေ့ချင်ပေမယ့် မလွယ်ပဲလေ ။

ဘဝမှာ တခါတလေ တချို့စိတ်ကူးတွေက စိတ်ကူးတွေသက်သက်မျှ ။ တကယ့်လက်တွေ့နှင့် ထိစပ်ကြည့်လို့ မရပြန် ။ ထိစပ်ကြည့်မိပြန်တော့လည်း မျှော်လင့်ထားခဲ့သလို နှင့် မတူတော့ပြန် ။တခါတလေ ကြိုတွေး ပျော်ရွှင်မိတာတွေကို နှမျောနေမိပြန်သည်။ ထိစပ်မကြည့်မိဘဲ ဒီအတိုင်းလေးဆိုရင် တော့လည်း အမြဲတမ်း စိတ်ကူးလေးနှင့် ပျော်ရွှင်နေသွားနိုင်သည် ။သိပ်စိတ်ကူး မယဉ်တတ်တော့တဲ့ အရွယ် ရောက်နေပေမယ့် တိမ်တွေမြင် ငေးတတ် လေယာဉ်ပျံတွေ တွေ့ရင် ဘယ်လို ခရီးကိုသွားပြီး ဘယ်လိုကွင်းမှာ ဆင်းမှာပါလိမ့် လို့တော့ တွေးနေမိမြဲဖြစ်သည်။

ပြတင်းပေါက်ကို ကျောခိုင်းပြီး အိပ်ယာပေါ် လှဲချလိုက်တော့ စိတ်ကူးထဲမှာ လေယာဉ်ပျံတွေ ဝဲနေတုန်း ရှိသေးသည် ။ ကိုယ့်ကိုယ်ကိုယ်လည်း ဘယ်လိုလေယာဉ်ကွင်းမျိုးပါလိမ့်လို့ ဆက်စဉ်းစားမိနေသည် ။ လေယာဉ်နှင့် ခရီးသွားတိုင်း တိမ်တွေ မညီမညာ ရှိတတ်သည့် တိမ်ကြမ်းလမ်းတွေအကြောင်းလည်း ဆက်တွေးမိနေသေး၏ ။

(ဆရာသုခမိန်လှိုင်၏ အာကာသခရီးကဗျာလေးကို အစ်မ မနော်၏ အိုင်ဒီယာ မဂ္ဂဇင်း ဘလောဂ့်မှ ခဏ ငှားထားပါတယ်။)
လင်းဒီပ
၂၁.၇.၀၉